Courtesy: MDRRMO Calayan

Nasa maayos nang kalagayan ang pitong indibiduwal na sakay nang nawawalang bangka na may tatak na Ren-Zen 2 na papunta sana sa isla ng Calayan noong Enero 15, 2025.

Agad na nabigyan ng atensyong medikal ang pitong katao na kinabibilangan ng limang tripulante at dalawang pasahero kasama na ang isang kawani ng Philippine Coast Guard (PCG) para matiyak ang kanilang kaligtasan matapos ang ilang araw na sila’y napaulat na nawawala.

Ganap na  alas-singko, Enero 17, 2025 nang nakita na ang pitong indibidwal kasama ang kanilang inaayos na bangka sa Dalupiri Island matapos ang ilang araw na paghahanap ng mga otoridad.

Hinihintay na lamang ang maayos na lagay ng panahon para muling makabyahe papuntang mainland Calayan.

Base sa mga opisyal ng Dalupiri Island, habang naglalayag ang pitong katao papunta sa Calayan ay nagkaroon ng aberya at nasira ang makina ng kanilang bangka sa baybayin sa pagitan ng Calayan at Dalupiri kaya’t nagdesisyon silang pumunta sa pampang ng Dalupiri Island dahil ito na ang pinakamalapit na pwede nilang puntahan.

Inayos pa umano ng mga nasabing indibiduwal ang kanilang bangka para makapunta malapit sa centro ng Dalupiri kung saan mayroon nang mga residente na tumulong sa kanila.

Hindi naman umano nagawang humingi ng tulong ang mga nasabing indibiduwal dahil wala ring signal sa kanilang kinarorooan.

Sapat naman ang kanilang kinain habang nasa gilid ng dagat dahil may mga dala silang suplay mula sa mainland Cagayan.

Una rito, 4:30 ng umaga noong Enero 15, 2025 nang pumalaot ang pitong indibiduwal mula sa bayan ng Claveria papunta sa Calayan nguni’t bigong makarating sa nakatakdang limang oras na biyahe hanggang sa sila’y makita ng mga kapwa mangingisda at rescuers noong Biyernes (Jan. 17) ng alas-singko ng hapon sa isla ng Dalupiri.#